Landverðir Vatnajökulsþjóðgarðs á Jökulsárlóni hafa verið duglegir að hreinsa rusl af Breiðarmerkurs…
Landverðir Vatnajökulsþjóðgarðs á Jökulsárlóni hafa verið duglegir að hreinsa rusl af Breiðarmerkursandi í sumar. En betur má ef duga skal! /mynd: Rósa Björk Halldórsdóttir

Vatnajökulsþjóðgarður, Sveitarfélagið Hornafjörður og stofnanir Nýheima í samstarfi og með stuðningi landeigenda og fyrirtækja á Hornafirði standa fyrir strandhreinsun á degi íslenskrar náttúru, laugardaginn 16. september. Í ár ber Alþjóða strandhreinsunardaginn upp á sama dag og er því við hæfi að tileinka daginn strandlengju sveitarfélagsins og hafinu.

Ætlunin er að hreinsa afmarkað svæði á Breiðamerkursandi, frá Reynivöllum að Kvíármýrarkambi. Hluti af því svæði er nú innan Vatnajökulsþjóðgarðs eftir stækkun garðsins í sumar og nær þjóðgarðurinn nú milli fjalls og fjöru.

Hreinsunin stendur yfir frá 10:00 - 16:00 og lýkur með grillveislu í boði Nettó.

Viljum við hvetja íbúa og alla sem vettlingi geta valdið til að taka þátt í verkefninu því margar hendur vinna létt verk. Nauðsynleg ílát til ruslatínslu verða á staðnum, á meðan birgðir endast. Einnig verða gámar á svæðinu og allt endurvinnanlegt og endurnýtanlegt efni verður flokkað frá því sem þarf að urða. Vatnajökull Travel býður upp á rútuferðir frá Höfn og er brottför frá sundlauginni kl. 9, og tilbaka frá Hrollaugshólum kl. 17. Þeir sem kjósa að mæta á einkabílum geta hitt umsjónarmenn hreinsunarinnar við Hrolllaugshóla, rétt vestan við Fellsá. Við hvetjum fólk til þess að sameina í bílana. Einnig má hafa samband við umsjónarmenn þegar fólk mætir á Breiðamerkursand, en ekki er skilyrði að vera með allan tímann. Þeir sem ekki komast þennan dag eru hvattir til hreinsunarátaks í sínu nærumhverfi.

Þeir sem geta lagt fram vinnutæki eins og dráttavélar, fjórhjól, kerrur, vagna o.fl. mega setja sig í samband við Rósu Björk í síma 842 4355

Fylgjast má með viðburðinum á Facebook, Strandhreinsun á Breiðamerkursandi - Dagur íslenskrar náttúru.

Við viljum benda áhugasömum á að þátttakendur bera ábyrgð á eigin öryggi og undirbúningi fyrir viðburðinn. Börn eru ætíð á ábyrgð foreldra/umsjónarmanna. Nánari upplýsingar um strandhreinsanir má finna á vefnum hreinsumisland.is.

 

Eftirfarandi atriði er svo  gott að hafa í huga fyrir strandhreinsunina:

  • Gott er að hafa með sér vinnuhanska eða vettlinga;

  • Takið með ykkur vatnsflöskur, nesti og fjölnota drykkjarílát

  • Takið með ykkur fjölnota burðarílát (poka, fötur)

  • Sólarvörn er haustsólin skín

 

Við viljum þakka eftirfarandi fyrirtækjum fyrir stuðninginn:

- Nettó, Skinney Þinganes, Vatnajökull Travel, Glacier Adventure, Rósaberg ehf., Funi ehf., Íslenska Gámafélagið, Vinir Vatnajökuls, og Blái Herinn.


Fannst þér efnið á síðunni hjálplegt?