Velkomin á vestursvæði Vatnajökulsþjóðgarðs

Lakagígar eru um 25 kílómetra löng gígaröð. Hún varð til í miklu gosi 1783 til 1784 sem er annað stærsta hraungos Íslandssögunnar. Gígarnir þykja einstakir á heimsvísu og eru í dag flestir þeirra þaktir mosagróðri sem gerir þá enn fegurri.

Eldgjá er um 75 km löng gossprunga og nær frá Mýrdalsjökli langleiðina að Vatnajökli. Hún varð til í einu mesta gosi Íslandssögunnar árið 939. Sá hluti gjárinnar sem í daglegu tali nefnist Eldgjá er um 8 km að lengd, 600 m á breidd og 150 m þar sem hún er dýpst.

Langisjór er stöðuvatn í jaðri Vatnajökuls. Vatnið er um 20 km að lengd og 2 km þar sem það er breiðast. Mesta mælda dýpi er 73,5 m. Skaftfellskir leitarmenn fundu vatnið árið 1878 og gaf Þorvaldur Thoroddsen því nafnið Langisjór. 

Vegasamgöngur

Vegir á vestursvæði þjóðgarðsins eru fjallvegir sem aðeins eru færir fjórhjóladrifnum bílum og sumir aðeins breyttum jeppum. Víða er lausamöl og grýttir eða holóttir kaflar og sums staðar þarf að fara yfir dragár eða jafnvel jökulár sem geta vaxið fyrirvaralítið og orðið varhugaverðar eða ófærar.

Svæðið er opið ferðamönnum allan ársins hring en það ræðst af snjóalögum og veðurfari hversu lengi vegir eru opnir. Venjulega eru þeir opnir upp úr miðjum júní og eitthvað fram eftir hausti. Aðeins má aka þá vegi sem merktir eru á meðfylgjandi korti, aðrir vegir og slóðar á svæðinu eru lokaðir fyrir almennum akstri. Hér sem annars staðar er stranglega bannað að aka utan vega.

Vegurinn að Lakagígum (F206) liggur frá þjóðvegi 1 við Hunkubakka í Skaftárhreppi.

Til að komast að Eldgjá og Langasjó er farin Fjallabaksleið nyrðri (F208) sem hefst að austanverðu við bæinn Búland í Skaftártungu og vestan frá við Sigöldu á Sprengisandsleið (F26). Afleggjarinn að Langasjó (F235) liggur af Fjallabaksleið nyrðri um 3 km vestan Eldgjár. Að Jökulheimum á Tungnaáröræfum liggur vegur F229 frá Veiðivötnum og einnig vegslóði að norðan frá Sprengisandsleið um Þórisós.

Opnun fjallvega er mismunandi milli ára, sjá nánari upplýsingar á vef vegagerðarinnar.

Almenningssamgöngur

Á sumrin fer áætlunarbifreið frá Skaftafelli í Laka, með viðkomu á Kirkjubæjarklaustri. Rútan hefur viðkomu við Fjaðrárgljúfur, Fagrafoss, Laka og Tjarnargíg og gefst farþegum kostur á að skoða sig um. Í lok dags fer rútan aftur í Skaftafell (sjá www.re.is).

Kynnisferðir (www.re.is) aka á milli Landmannalauga og Skaftafells daglega frá því að Fjallabaksleið nyrðri opnast á sumrin og fram í september. Rútan hefur viðkomu í Eldgjá og gefst farþegum tækifæri til að ganga að Ófærufossi.

Engar reglubundnar ferðir eru að Langasjó eða Jökulheimum.

Gisting

Þjóðgarðurinn leigir út gangnamannaskála Skaftárhrepps við Blágil og rekur þar tjaldsvæði. Bókanir fara fram í gegnum Skaftárstofu, gestastofu þjóðgarðsins á Kirkjubæjarklaustri, sími 4874620 og netfangið klaustur hjá vjp.is.

Við Hólaskjól er gangnamannaskáli og tjaldsvæði sem rekið er af Veiðifélagi Skaftártungumanna. Nánari upplýsingar í netfanginu holaskjol hjá holaskjol.com.

Tjaldsvæði er við suðurenda Langasjávar og þar er salernisaðstaða og rennandi vatn. Landverðir á svæðinu gefa nánari upplýsingar.