Tjaldsvæði

Skematískt kort af tjaldsvæði í Skaftafelli

Afgreiðslutími tjaldsvæðismóttöku:

Janúar - Febrúar: 10:00 - 20:00
Mars - Apríl: 9:00 - 21:00
Maí:
 9:00-22:00
Júní - Ágúst: 8:00-23:00
September - Desember: 9:00-21:00

 

  • Starfsmenn hafa aðstöðu við innkeyrsluhlið að vestanverðu yfir sumartímann en í gestastofu yfir vetrartímann (október - maí)
  • Athugið að vegna hættu á frostskemmdum er ekki hægt að setja vatn á allt tjaldsvæðið fyrr en um miðjan maí að öllu jöfnu.
  • Aðeins C flöt er opin yfir vetrartímann til þess að koma í veg fyrir skemmdir á öðrum flötum.
  • Stilla á allri umferð bifreiða í hóf eftir klukkan 23:00 á kvöldin.
  • Vakin er athygli á því að hvorki er hægt að leigja tjöld né annan búnað.

 

Sími á tjaldsvæði: 842 4350 (aðeins á sumrin til 22:00)
Sími í Skaftafellsstofu: 470 8300

netfang: skaftafell@vjp.is

 

Gjaldskrá fyrir tjaldsvæðið í Skaftafelli 2019

Stæðisgjald* fyrir hverja gistieiningu (gisitieining getur verið tjald, hjólhýsi, húsbíl o.s.frv.) per nótt: 500 kr.

Gistigjöld, per nótt:

  • Fullorðnir (18-66 ára) hver nótt: 1.750 kr.
  • Eldri borgarar (67 ár og eldri) og öryrkjar: 1.500 kr.
  • Börn (13 til 17 ára) í fylgd með fullorðnum: 1.000 kr.
  • Börn (12 ára og yngri) í fylgd með fullorðnum: gjaldfrjáls

Þegar greitt er samtímis fyrir fleiri nætur en eina er veittur 300 króna afsláttur per einstakling fyrir hverja nótt umfram fyrstu nótt.

Dæmi: Par sem borgar fyrir eina nótt greiðir 1.750 krónur fyrir hvorn einstakling auk 500 króna stæðisgjalds, samtals 4.000 krónur. En ef greitt er samtímis fyrir aukanótt lækkar gjaldið um 300 krónur fyrir hvorn einstakling og því kostar viðbótarnóttin 3.400 krónur. Samtals eru því greiddar 7.400 krónur fyrir tvær nætur.

Önnur þjónusta:

  • Rafmagn (hver sólarhringur): 1.000 krónur
  • Sturta: innifalin í gistigjaldi
  • Þvottavél: 500 krónur

 

Hópaafsláttur: 10 manna hópur eða fleiri: 10% afsláttur af gistingu, utan stæðisgjalds, ef staðgreitt. Skilyrði er að greitt sé fyrir allan hópinn í einu lagi.

* Gistináttaskattur krónur 333 er innifalinn í stæðisgjaldi.

 

Hópabókanir fyrir rafmagn 2019

  • Bókanir fyrir rafmagnspláss á tjaldsvæði fer fram í gegnum tölvupóst - skaftafellcamping@vjp.is
  • Aðeins er tekið frá fyrir einn hóp á dag (lágmark 10 bílar í hóp).
  • Bókanir þurfa að berast með að minnsta kosti 2 mánaða fyrirvara.
  • Ein greiðsla skal gerð fyrir allan hópinn.

 Bókanir fyrir tjaldhópa (ef ekki er þörf á rafmagni) eru ekki mögulegar.

 

Í Skaftafelli eru stæði fyrir um 400 tjöld. Ekki er hægt að taka frá stæði (nema fyrir hópa, sjá hér fyrir ofan) en það er nægt rými fyrir alla sem vilja koma.

Sérstakar flatir eru ætlaðar fyrir húsbíla, hjólhýsi og fellihýsi. Þar eru tenglar fyrir rafmagn.

Salernisaðstaða er við Skaftafellsstofu og í tveimur þjónustuhúsum á tjaldsvæðinu. Sturtur eru staðsettar á miðju tjaldsvæðinu. 

Þvottavél og þurrkari er í þvottarými í Landvarðahúsi, skrifstofubyggingunni næst Skaftafellsstofu.

Enginn sérstök eldunaraðstaða er fyrir gesti tjaldsvæðis. Þó eru vaskar undir skyggni salernishúss við Skaftafellsstofu sem og grill sem gestir mega nota.

Gott 3G samband er á tjaldsvæðinu og einnig opið þráðlaust internet (Vodafone Connect).

 

Gestir á tjaldsvæðinu í Skaftafelli eru beðnir um að hafa eftirfarandi í huga:

  • Sýnum öðrum gestum þjóðgarðsins fyllstu kurteisi og tillitssemi í hvívetna. Njótum fuglasöngs og kyrrðar náttúrunnar og spillum henni ekki með háværum tónlistarflutningi eða háreysti. Gætum hófs þegar áfengi er haft um hönd.
  • Næturfriður skal ríkja á tjaldsvæðum þjóðgarðsins frá kl. 23:30 til 07:00.
  • Óheimilt er að afla eldiviðar innan marka þjóðgarðsins. Gæta skal þess að skapa hvorki eldhættu né valda gróðurskemmdum með ógætilegri meðferð kolagrilla, gasgrilla eða annarra eldunartækja. Forðast skal að spilla gróðri með því að hella niður heitu vatni eða óhreinu.
  • Gæludýr eru leyfileg á tjaldsvæðum þjóðgarðsins séu þau í tryggri vörslu umráðamanna sinna. Hundar skulu ávallt vera í bandi. Gæta skal þess að gæludýr valdi ekki truflun á lífríki þjóðgarðsins eða valdi gestum ónæði.
  • Ávallt skal ganga snyrtilega um tjaldsvæðið og nágrenni þess. Sorp og annan úrgang skal setja í þar til gerð ílát og flokka ef þess gefst kostur (sorpflokkunarstöð er við Skaftafellsstofu). Flöskur og dósir með skilagjaldi má setja í þar til gerð búr en ágóði af þeim rennur óskiptur til Björgunarsveitarinnar Kára í Öræfum.

 

Tjöldun utan merktra tjaldsvæða er að öllu jöfnu óheimil í Skaftafelli, þ.m.t. á Skaftafellsheiði, í Bæjarstaðarskógi og í Morsárdal. Þó er heimilt að tjalda í Skaftafellsfjöllum ofan 400 metra hæðar og á svæði í mynni Kjósar. Ferðafólk afli upplýsinga hjá þjóðgarðinum um tjöldun á þessum svæðum.