Upplýsingar um svæðisgjald í Skaftafelli
Gjaldskrá Vatnajökulsþjóðgarðs er gefin út árlega af umhverfis- og auðlindaráðuneytinu, byggð á lögum um Vatnajökulsþjóðgarð. Frá því um haustið 2017 hafa m.a. verið innheimt svokölluð svæðisgjöld í Skaftafelli af bifreiðum sem þangað koma nema þeirra sem gista á tjaldsvæðinu en þá eru svæðisgjöldin innifalin. Gjöldin eru innheimt fyrir veitta þjónustu og aðgang að svæðinu. Dæmi um þessa þjónustu er aðgangur að bílastæðum, gestastofu, salernum, fræðslu og leiðbeiningum frá landvörðum, aðgangur að gönguleiðum, viðhald á innviðum og frír aðgangur að fræðslugöngum með leiðsögn landvarða þegar þær eru á dagskrá.
Þegar ekið er inn í Skaftafell les myndavélakerfi númerplötur bifreiða og fyrir hverja bifreið er skráð svæðisgjald. Gjaldið er svo hægt að greiða í gegnum tölvukerfið „myParking“ sem hannað er af fyrirtækinu Computer Vision ehf. Hægt er að greiða svæðisgjaldið ýmist í greiðsluvél, með snjallforriti eða á heimasíðu (https://parka.is/). Sé gjaldið ekki greitt fer það í heimabanka þess sem er skráður fyrirbifreiðnni og sé það ekki greitt þar endar gjaldið í innheimtu.
Rökin fyrir gjaldtökunni eru að þeir sem nýta þjónustuna í Skaftafelli taki þátt í að greiða fyrir hana í stað þess að kostnaðinn við rekstur svæðisins sé alfarið lagður á íslenska skattgreiðendur. Með því móti er einnig verið að jafna hlut erlendra ferðamanna sem þekkja til slíkrar gjaldtöku erlendis og eru fúsir til að taka þátt í kostnaði sem fylgir náttúruvernd og rekstri þjóðgarðs eins og í Skaftafelli þar sem njóta má einstakrar náttúru á heimsvísu.