Nýtt upplýsingahús á tjaldsvæði Ásbyrgis
Í gær var tekið í notkun nýtt upplýsingahús á tjaldsvæðinu í Ásbyrgi. Húsið hefur fengið nafnið Álfhóll og er ætlunin að nýta það til að bæta þjónustu við gesti tjaldsvæðisins.
![](/_next/image?url=https%3A%2F%2Fimages.prismic.io%2Fvatnajokulsthjodgardur%2Fe88707c9-fbae-4d61-9f4c-8f287d1215e9_2018%2B06%2B29-frettir-nytt%2Bmottokuhus%2BAsbyrgi.jpg%3Fauto%3Dformat%26crop%3Dfaces%252Cedges%26fit%3Dcrop%26w%3D1640%26h%3D820&w=3840&q=80)
Í gær var tekið í notkun nýtt upplýsingahús á tjaldsvæðinu í Ásbyrgi. Húsið hefur fengið nafnið Álfhóll og er ætlunin að nýta það til að bæta þjónustu við gesti tjaldsvæðisins. Landverðir munu hafa viðveru í húsinu frá klukkan 17 til 22 alla daga fram í ágúst, þó viðbúið sé að þeir munu af og til bregða sér frá á auglýstum afgreiðslutíma í einhverjar reddingar.
Upplýsingahúsið Álfhóll stendur rétt norðan við stóra snyrtihúsið og blasir við þegar keyrt er af Ásbyrgisvegi inn að tjaldsvæðinu. Gestir eru hvattir til að ganga frá tjaldgistigjöldum í Álfhóli á komudegi, ekki síst til að losna við að vera vaktir upp snemma næsta morgun. Í Álfhóli er einnig hægt að fá upplýsingar um gönguleiðir og ýmsa afþreyingarmöguleika í nágrenninu, millistykki fyrir rafmagnstengla, skiptimynt og vonandi flest annað sem þörf þykir fyrir.
Þess má geta að nýja upplýsingahúsið er ekki alveg nýtt; það var áður notað sem upplýsingahús í Möðrudal og þar á undan var það staðsett við Jarðböðin í Mývatnssveit. En hvort það eigi sér lengri forsögu þekkjum við ekki. Lumi einhver á vitneskju um það þætti okkur forvitnilegt að heyra af því.