Grasafræðingar frá tékkneska þjóðgarðinum Krkonoše heimsóttu austursvæði

Austursvæði Vatnajökulsþjóðgarðs fékk á dögunum í heimsókn fimm grasafræðinga frá tékkneska Krkonoše-þjóðgarðinum (KRNAP). Þrátt fyrir ólíkt veðurfar og landslag eiga þjóðgarðarnir tveir ýmislegt sameiginlegt, meðal annars gróður sem er einkennandi fyrir bæði alpín svæði í Tékklandi og íslenska hálendið. Hópurinn hafði því sérstakan áhuga á að kynnast gróðurfari Snæfellsöræfa.

Þórhallur Jóhannsson, aðstoðarþjóðgarðsvörður, og Martína Ýr Kasparova tóku á móti hópnum í Snæfellsstofu. Þar hélt Martína kynningu á tékknesku um austursvæði Vatnajökulsþjóðgarðs, með sérstakri áherslu á náttúru og sérkenni Snæfellsöræfa.

Daginn eftir hélt hópurinn í vettvangsferð ásamt þjóðgarðsvörðunum Rögnu Fanney og Þórhalli og Jónatani, yfirlandverði á svæðinu. Fyrst var farið í Hólmanes þar sem Sara landvörður tók á móti hópnum og sagði frá náttúru og sérkennum friðlýsta svæðisins.

Þaðan lá leiðin upp á Snæfellssvæðið, þar sem gengið var í Sótavistir og gróðurinn skoðaður gaumgæfilega á leiðinni.

Grasafræðingarnir voru í essinu sínu enda gafst þeim þar tækifæri til að sjá fjölmargar plöntutegundir sem einkenna arktíska og alpínska tundru. Þrátt fyrir að svæðið liggi í um 600–800 metra hæð yfir sjávarmáli má þar finna allt að 130 plöntutegundir. Plönturnar voru skoðaðar af miklum áhuga, ljósmyndaðar af kappi og margar þeirra greindar jafnóðum á vettvangi.

Á leiðinni var einnig komið við í Snæfellsskála þar sem hópnum var boðið upp á kaffi, íslenskt bakkelsi og flatkökur með hangikjöti – kærkomin hressing eftir plöntuskoðun dagsins. Áður en haldið niður af hálendinu var látið á reyna samstarfið milli þjóðgarðanna, þegar grasafræðingarnir aðstoðuðu við að bera nýja kamínu inn í Snæfellsskála.

Heimsóknin gaf gott tækifæri til að skiptast á þekkingu og reynslu, ræða sameiginleg viðfangsefni og styrkja tengsl milli þjóðgarðanna tveggja.