Dettifoss
Dettifoss er kraftmesti foss Evrópu. Ógnarkraftinn má finna með því að leggja lófa við klappir nálægt fossinum og finna hvernig bjargið titrar. Hægt og bítandi grefur hann sig í gegnum fossbrúnina og færir þannig sjálfan sig sífellt sunnar eða um hálfan meter á ári.
Frá bílastæðinu að útsýnisstað við Dettifoss er um 1 km ganga (aðra leið). Þaðan er hægt að ganga sömu leið tilbaka á bílastæðið.
Varúð: Úðinn frá fossinum fer yfir á vestubakka árinnar, yfir útsýnisstað og göngustíga. Það er því mjög mikil bleyta nálægt fossinum, stígar geta verið sleipir og vegfarendur beðnir um að fara varlega. Að vetrarlagi og í miklum frosthörkum geta myndast miklir svellbunkar nálægt fossinum og fólki ekki ráðlagt að fara alveg að gljúfurbrún.