Orka náttúrunnar opnar hlöðu við Jökulsárlón

Orka náttúrunnar hefur í samstarfi við Vatnajökulsþjóðgarð opnað hlöðu fyrir rafbíla við Jökulsárlón. Starfsmenn Vatnajökulsþjóðgarðs voru starfsfólki ON innan handar við að sækja fyrstu hleðsluna s.l. föstudag. Aðstandendur verkefnisins segja það mikils virði að geta opnað á þessum stað, í þessari fallegu náttúru, svo fólk geti keyrt um á orku náttúrunnar og þannig stuðlað að orkuskiptum í samgöngum.

Jökulsárlón er einn af fjölsóttari ferðamannastöðum landsins. Tvær stöðvar eru í hlöðunni, hraðhleðslustöð búin þrenns konar tengjum, og hefðbundin hleðslustöð. ON Hefur nú reist 21 hlöðu og verða þær orðnar um 50 talsins í lok næsta árs.


Fannst þér efnið á síðunni hjálplegt?