50 ára afmæli þjóðgarðs í Skaftafelli – Afmælishátíð laugardaginn 24. nóvember

Skaftafell 1. nóvember 2018
Skaftafell 1. nóvember 2018

Í tilefni 50 ára sögu þjóðgarðs í Skaftafelli verður dagskrá í Skaftafelli laugardaginn 24. nóvember 2018  kl. 13-15.  Lengst af var starfsemin bundin við sumarmánuðina en nú koma gestir allan ársins hring. 

Á árinu 1968 tók í gildi reglugerð um þjóðgarð í Skaftafelli.  Bændur í Skaftafelli höfðu fallist á að selja ríkinu jörðina fyrir þjóðgarð til þess að gefa landsmönnum og öðrum ferðamönnum kost á því að njóta náttúrufegurðar staðarins og upplifa söguna sem nær aftur að landnámi. Andstæðurnar eru hrífandi: svartir sandar kallast á við gróðurvinjar og jökullinn hefur mikil áhrif á sitt nánasta umhverfi. Síðustu 10 árin hefur Skaftafell verið hluti af Vatnajökulsþjóðgarði og gestum fjölgar ár frá ári. Á fyrstu árum þjóðgarðs í Skaftafelli þegar hringvegurinn hafði opnast var heildarfjöldi gesta tæplega 20 þúsund manns á ári, en á þessu ári má áætla að hátt í 800 þúsund manns komi á svæðið. 

Til þess að auðvelda skipulagið værum við þakklát fyrir það að þeir sem hafa hug á að mæta og fagna þessum tímamótum með okkur tilkynni þátttöku sína með því að senda póst á netfangið sigrun@vjp.is. Nánari dagskrá verður auglýst þegar nær dregur.  Í afmælisveislunni geta gestir skráð bílnúmer sín til að hægt sé að fella niður þjónustugjaldið fyrir ökutækin.  

Helga Árnadóttir 

Þjóðgarðsvörður á suðursvæði Vatnajökulsþjóðgarðs


Fannst þér efnið á síðunni hjálplegt?