Nýidalur, sem einnig ber nafnið Jökuldalur, fannst líklega síðastur allra öræfadala. Skýringin gæti verið sú að hann sést illa af hinni fornu Sprengisandsleið sem liggur 20 km vestar. Skammt norðan sæluhúsanna í Nýjadal er gróðurvin sem kallast Tómasarhagi. Hún er nefnd eftir Fjölnismanninum Tómasi Sæmundssyni sem fann blettinn fyrir tilviljun þegar hann var á leið norður Sprengisand og villtist af leið í vondu veðri. Öllum að óvörum fóru hestarnir að krafsa í snjóinn og bíta gras í þessari eyðimörk þar sem einskis var von.