Hvernig myndast jökull?

Jökull er samsettur úr ískristöllum, snjó, lofti, vatni og seti. Jökulís er að mestu orðinn til úr snjó og aðeins að litlu leyti við frystingu vatns. Jöklar myndast þar sem meiri snjór fellur yfir árið en bráðnar að jafnaði að sumrinu. Snjóalögin hlaðast hvert ofan á annað og með auknu fargi þjappast snjórinn saman og umbreytist fyrst í hjarn og síðar ís. Þessi atburðarás verður á safnsvæði jöklanna en þegar jökullinn fergist undir eigin þunga tekur hann að hníga eins og seigfljótandi vökvi eða deig undan halla. Þannig skríður jökullinn niður fjallshlíðar og dali í átt að leysingarsvæðinu og bráðnar með hækkandi lofthita eftir því sem neðar dregur.

Ummyndun snævar í jökulís.

Ummyndun snævar í jökulís.