Skjáskot úr myndbandi frá mælingaflugi Jarðvísindastofnunar HÍ.
Skjáskot úr myndbandi frá mælingaflugi Jarðvísindastofnunar HÍ.

Varað er við sprungum á ferðaleið austur af Grímsfjalli. Ríkislögreglustjóri, í samráði við lögreglustjórann á Suðurlandi, hefur aflýst óvissustigi almannavarna vegna jökulhlaups frá Grímsvötnum.

Jökulhlaupið náði hámarki 5. desember og rann við það mest allt vatn úr Grímsvötnum. Rennsli í Gígjukvísl nálgast nú eðlilegt vetrarrennsli. Samfara hlaupinu seig íshella Grímsvatna um 70 metra þar sem mest var, en á myndbandi á síðu Jarðvísindastofnunar HÍ sést glöggt uppbrot ís syðst í Grímsvötnum . Í atburðinum mynduðust 70 m djúpur sigketill suðaustur af Grímsfjalli og sigdæld austur af fjallinu, sem sjá má á myndbandi hér. Af þessum ástæðum hafa sprungur myndast á ferðaleiðinni austur af Grímsfjalli og er því varað við ferðum á þeim slóðum.

Nýafstaðið jökulhlaup úr Grímsvötnum og hættan sem var á eldgosi í kjölfarið, varpa ljósi á mikilvægi vísindarannsókna og þá miklu fagmennsku sem er á því sviði hér á landi. Vatnajökulsþjóðgarður vill í því samhengi þakka fyrir gott samstarf við Almannavarnir, embætti Lögreglustjórans á Suðurlandi, Jarðvísindastofnun Háskóla Íslands og Veðurstofu Íslands.


Fannst þér efnið á síðunni hjálplegt?