Ný reglugerð fyrir Vatnajökulsþjóðgarð

Ferðafólk í Jökulsárgljúfrum (mynd: Stefanía Ragnarsdóttir)
Ferðafólk í Jökulsárgljúfrum (mynd: Stefanía Ragnarsdóttir)

Reglugerð um Vatnajökulsþjóðgarð hefur verið endurútgefin með viðbót sem fjallar um atvinnutengda starfsemi í þjóðgarðinum. Tilgangurinn er að móta samræmdar reglur fyrir atvinnustarfsemi innan þjóðgarðsins á grunni atvinnustefnu hans.

Með atvinnustefnu útskýrir stjórn þjóðgarðsins hvernig samstarfi hans við atvinnulífið á að vera háttað. Samkvæmt lögum um þjóðgarðinn er óheimilt er að reka atvinnutengda starfsemi í þjóðgarðinum án samnings um slíka starfsemi við Vatnajökulsþjóðgarð. Atvinnustefnan útskýrir m.a. hvers konar atriði verða sett í samninga varðandi réttindi og skyldur aðila.

Með þessum breytingum á reglugerðinni eru því skapaðar forsendur fyrir innleiðingu atvinnustefnunnar. Einnig skapast betri forsendur fyrir atvinnustarfsemi í þjóðgarðinum og grundvöllur styrkist fyrir stjórnsýslu Vatnajökulsþjóðgarðs um atvinnutengda starfsemi. Þjóðgarðurinn hefur samtímis unnið að gerð verkferla við gerð samninga og útgáfu þeirra leyfa sem kveðið er á um í reglugerðinni. Með þessum umbótum á regluverki þjóðgarðsins er því verið að skapa forsendur fyrir fjölbreytta og öfluga atvinnutengda starfsemi í tengslum við hann með vernd náttúru og sjálfbærni að leiðarljósi.

Almennt leitast Vatnajökulsþjóðgarður við að hafa virkt og skipulagt samráð við þá sem stunda atvinnurekstur í Vatnajökulsþjóðgarði og nágrenni hans. Er það yfirlýst markmið þjóðgarðsins að miðla upplýsingum, tímanlega og ítarlega, um fyrirætlanir sínar og stjórnsýslu.

Reglugerðin fékk númerið 300/2020 og einfaldar og skýrir mjög löggjöf þjóðgarðsins eins og sjá má á listanum hér fyrir neðan yfir reglugerðir sem falla úr gildi:

- Reglugerð nr. 608/2008 um Vatnajökulsþjóðgarð með síðari breytingum sbr.

- Reglugerð nr. 755/2009,

- Reglugerð nr. 764/2011,

- Reglugerð nr. 463/2013,

- Reglugerð nr. 724/2013,

- Reglugerð nr. 749/2013,

- Reglugerð nr. 457/2014,

- Reglugerð nr. 730/2017,

- Reglugerð nr. 663/2019,

- Reglugerð nr. 739/2019


Fannst þér efnið á síðunni hjálplegt?