Beint í leiðarkerfi vefsins.
Lakagígar eru um 25 kílómetra löng gígaröð sem varð til fyrir tæplega 250 árum síðan í einhverju mesta eldgosi sem orðið hefur á sögulegum tíma. Eru gígarnir kenndir við móbergsfjallið Laka sem stendur um miðja gígaröðina.
Lakagígar eru friðlýst náttúruvætti sem þykir einstakt á heimsvísu og er Laki einn fjölsóttasti áfangastaður ferðamanna á vestursvæði Vatnajökulsþjóðgarðs.
Frá þjóðvegi 1 liggur fjallvegur F206 að Laka. Óbrúaðar ár eru á leiðinni sem geta vaxið mjög í miklum rigningum.
Á sumrin fer áætlunarbifreið frá Skaftafelli í Laka, með viðkomu á Kirkjubæjarklaustri, og er ferðinni þá heitið að Tjarnargíg (sjá www.re.is).
Gangnamannaskáli er í Blágiljum og er einungis opinn þeim sem pantað hafa gistingu fyrirfram. Skálinn er í umsjá Skaftárhrepps. Í Blágiljum er einnig tjaldsvæði og kamar. Við Tjarnargíg er vatnssalerni, aðgengilegt fyrir alla. Frekari upplýsingar um gistingu í V-Skaftafellssýslu má finna á www.klaustur.is
Landvörður er í Laka yfir sumartímann sem veitir ferðamönnum upplýsingar og fræðslu um svæðið.
Merktar gönguleiðir liggja um Lakagíga. Þær stystu eru um 20 mínútna gangur en sú lengsta 2-3 klukkustundir.
Lesa meira
