Beint í leiðarkerfi vefsins.
Kverkfjöll eru mikil megineldstöð í norðurbrún Vatnajökuls og þriðji hæsti fjallabálkur landsins á eftir Öræfajökli og Bárðarbungu. Í Kverkfjöllum hefur byggst upp þjónusta við ferðamenn og má finna þar áhugaverðar gönguleiðir um eitt öflugasta háhitasvæði landsins.
Norðan Kverkfjalla eru Hvannalindir; friðlýst gróðurvin þar sem finna má rústir útilegumannabæjar, en ýmsar vísbendingar eru um að Fjalla-Eyvindur hafi hafst þar við í útlegð sinni.
Frá svonefndri Austurleið (F910) liggur Kverfjallaleið (F902) suður til Kverkfjalla. Skammt austar liggur Hvannalindaleið (F903) suður í Hvannalindir og áfram þar sem hún kemur inn á veg F902.
Ferðafélag Fljótsdalshéraðs rekur Sigurðarskála í Kverkfjöllum og við hann er tjaldsvæði. Þar eru líka vatnssalerni og sturtur. (Sjá nánar á www.fljotsdalsherad.is/ferdafelag .) Engin gistiaðstaða er í Hvannalindum.
Á sumrin eru skála- og landverðir í Kverkfjöllum og landvörður í Hvannalindum. Veita þeir ferðamönnum allar helstu upplýsingar sem viðkoma svæðunum.
Skála- og landverðir í Kverkfjöllum veita ferðamönnum leiðsögn í skipulögðum göngum sem farnar eru að hverasvæði og á jökul. Frá bílastæði við Kreppuhrygg í Hvannalindum er stutt ganga að rústum útilegumanna.
Lesa meira
