Hoffell
Í Nesjum skammt norðan Hafnar í Hornafirði er Hoffell; fornt höfuðból í jaðri mikilla fjalla og Vatnajökull þar að baki. Hluti jarðarinnar er innan Vatnajökulsþjóðgarðs og hafa landeigendur byggt upp aðstöðu sem gerir ferðalöngum kleift að njóta svæðisins.
Hoffellsjökull er með stærstu skriðjöklum sem ganga úr Vatnajökli en hefur síðan á fyrri hluta síðustu aldar hopað mikið. Því hefur myndast djúpt lón fyrir framan jökultunguna sem á fljóta stórir ísjakar. Vegslóði liggur að jökulöldu í jaðri Hoffellsjökuls og fæst þaðan gott útsýni yfir jökulinn og lónið.
Austan Hoffellsjökuls eru Hofellsfjöll og Núpar; mikið fjalllendi sem um liggur fjöldi gönguleiða. Stutt hringleið er um Geitafellsbjörg og einnig má ganga á topp Geitafells. Lengri ganga er norður að Múla og Gjánúpi en þar blasa við snarbrött fjöll sem smöluð eru á hverju hausti. Á þeirri leið þarf að þvera Efstafellsgil sem er aðeins fyrir fótvissa fjallamenn.
