Askja / Herðubreiðarlindir
Askja, Víti og Öskjuvatn í Dyngjuföllum sem og Herðubreiðarlindir eru vinsælir viðkomustaður ferðamanna á hálendinu norðan Vatnajökuls. Herðbreiðalindir eru ekki innan Vatnajökulsþjóðgarðs, en eru friðlýstar og í umsjón þjóðgarðsins.
Frá bílastæði við Öskju (í Vikraborgum) er stikuð gönguleið að Víti og Öskjuvatni. Frá skálum FA í Dreka ganga margir inn Drekagil og frá Herðubreiðarlindum geta vanir fjallamenn gengið á sjálfa Herðubreið. Ferðafélag Akureyrar býður einnig upp á fjölmargar gönguleiðir og skíðaferðir um hálendið.
Á sumrin fara landverðir í Öskju og Herðubreiðarlindum í fræðslugöngur og er gestum frjálst að taka þátt. Sumarið 2011 eru göngurnar á tímabilinu 15. júlí - 20. ágúst. Í Öskju er gengið alla daga kl. 13 frá bílastæði við Vikraborgir og er áætlaður göngutími 60-90 mínútur. Í Herðubreiðarlindum er gengið alla daga kl. 11 frá Þorsteinsskála og er áætlaður göngutími 40-60 mínútur. Gestum er ráðlagt að hafa skjólgóðan fatnað meðferðis.
