Hoffellsjökull
Hoffell er landnámsjörð innst í Nesjum í Hornafirði. Landslag umhverfis Hoffell er fjölbreytilegt og fagurt, skriðjöklar, fjallstindar, ár og aurar. Fundist hefur heitt vatn á Hoffelli og eru þar heitar laugar í náttúrulegu umhverfi.
Hoffell er staðsett um 20 km frá Höfn í Hornafirði og er þar að finna margvíslegar gönguleiðir og fallega náttúruperlu við Hoffellsjökul. Af þjóðvegi 1 er 3 kílómetra langur malbikaður vegur sem liggur að gistiheimilinu í Hoffelli. Þar veita ábúendur einnig upplýsingar um gönguleiðir og svæðið í samstarfi við Vatnajökulsþjóðgarð. Einnig er þar að finna litla fræðslusýningu um Hoffellsjökul og svæðið þar í kring. Til þess að aka að Hoffellsjökli þarf að aka um 4 kílómetra langan malarveg sem er oft á tíðum illfær, sérstaklega í leysingum en þá getur vegurinn horfið á einstaka stöðum. Mælst er til þess að ferðast á fjórhóladrifnu ökutæki að bílastæðinu við Hoffellsjökul. Þó er hægt að ganga frá gistiheimilinu að bílastæðinu hjá jöklinum.
Fræðsla
Gönguleiðir
Hoffellsjökull (útsýnisstaður)
Gengið er frá bílastæði framan við Hoffellsjökul, inn með Geitafellsbjörgum suðvestanverðum. Með því fæst ágætt útsýni yfir Hoffellsjökul og lónið fyrir framan jökulinn. Sama leið er gengin til baka.
Geitafellsbjörg
Falleg hringleið um Geitafellsbjörg sem veitir gott útsýni yfir Hoffellsjökul og lónið fyrir framan hann.
Geitafellstindur - O4
Þessi leið fylgir hringleiðinni um Geitafellsbjörg í byrjun, það er fyrst er gengið upp brekku frá bílastæði framan við Hoffellsjökul.
Hoffell - Hoffellsjökull
Þessi gönguleið hefst við gistiheimilið í Hoffelli og fylgir hlíðum Hoffellsfjalls inn að Hoffellsjökli. Engar merkingar eru á þessari leið.
Mynd: iStock (The World Traveller)
Núpaleið
Þessi leið liggur um Núpa og Hoffellsfjöll, inn af Hoffelli. Hún er mjög erfið og aðeins fyrir vant fjallafólk. Mjög lítið fjarskiptasamband er á svæðinu. Mælt er með því að skilja eftir ferðaáætlun á www.safetravel.is.
Mynd: iStock (Anze Furlan)
